Leviticus 24
10 Mit Isrelieten was n man mitkommen, geboorteg oet n Isrelitische vraauw en n Egyptische man. Dij man kreeg op n dag rebulie mit ain oet Israël.
11 Dou e begunde te vluiken en God zien noam verwènste, wer e veurlaaid bie Mozes. Zien moeke haitte Selomit. Ze was ain van Dibri en heurde bie stam Dan.
12 Man wer vastzet tot n oetsproak van de HEER kloarhaid geven zol van wat of ter gebeuren mos.
13 De HEER zee tegen Mozes:
14 "Breng dij vluiker boeten legerkaamp. Aalmoal dij t heurd hebben, mouten hom haand op kop leggen en den mout e deur haile gemainschop mit stainen doodsmeten worden.
15 Tegen Isrelieten mostoe zeggen: 'Dij zien God vervlökt, zel gevolgen van zien zunde ondervinden.
16 Dij de HEER zien noam verwènst, mout doodmoakt worden, deur haile gemainschop mout e mit stainen doodsmeten worden. Of t nou n vremde is of n geboren Isreliet: dij mien noam verwènst, mout doodmoakt worden.
17 Ook dij n mensk doodslagt, mout doodmoakt worden.
18 En dij n daaier van aandermans vij doodslagt, mout t vergouden: n levent veur n levent.
19-20 As ain aander wat aandut, mout mit hom t zulfde doan worden: n breuk veur n breuk, n oog veur n oog, n taand veur n taand. Wat e dij aander aandoan het, zel hom ook aandoan worden.
21 Dat zodounde, ain dij n daaier doodslagt, mout t vergouden en dij n mensk doodslagt, mout doodmoakt worden.
22 Vremden en geboren Isrelieten mouten volgens t aigenste recht veroordaild worden. Ik bin de HEER, joen God.'"
23 Mozes zee dit tegen Isrelieten. Dou wer vluiker boeten legerkaamp brocht en mit stainen doodsmeten. Zo deden Isrelieten wat de HEER Mozes besteld haar.
|
